Соңғы бір жылда Қазақстанға келген электромобильдердің саны 10,2 есе артқан. Алдағы 4-5 жылдықта электромобильдерге қызмет көрсететін мамандар тапшы болуы мүмкін. Бұл туралы Маңғыстау жоғары политехникалық колледжінің мұғалімі Салтанат Лұқпанова мәлімдеді. Аталған проблеманың алдын алу үшін ол «Big Іdeas» жобасын бастаған, ал «Тәуелсіздік ұрпақтары» жобаның жандануына мүмкіндік берген.
Салтанат Лұқпанованың айтуынша, жобаның негізгі мақсаты – жұмысшы мамандық иелерінің беделін арттыру, өңірдегі автоэлектрик мамандарының санын көбейту, кәсіби автоэлектриктерді даярлау. Ғылыми прогресс жасау, студенттердің ғылымға қызығушылығын арттыру. Қазіргі таңда командада жеңіл автомобильге техникалық қызмет көрсету және жөндеу мамандығында оқитын 6 студент бар. Қазіргі таңда екі бағыт бойынша жұмыс жүргізіп жатыр.
«Негізгі бағыт – профориентация, яғни жалпы білім беретін мектептерге барып, жоғары сынып оқушыларына профориентация жүргіземіз. Оқушыларға автоэлектрик мамандығының маңызын түсіндіреміз. Осы саладағы көшбасшы тұлғаларды таныстырып, олардың табысын бағамдап, бағыт-бағдар беріп, салаға қызығушылығын арттырамыз. Ал тәжірибелік кезеңде жеңіл автомобильдердің оңға, солға бұрылатын фараларының жалғану схемасын үйретеміз. Осы арқылы мамандыққа қызықтырамыз», – дейді Салтанат Лұқпанова.
Жоба жетекшісі былтыр «Тәуелсіздік ұрпақтары» гранттарына қатысып, 1 млн теңге жеңіп алған. Қаржыға екі лаундж планшетін алынды, бұл электромобильдерге арнайы диагностика жасауға мүмкіндік береді. Бұдан бөлек онлайн курс, арнайы платформалар арқылы қосымша білім алып жатыр. Осы уақытқа дейін 7 мектеппен жұмыс жүргізілді, жалпы 200-ге жуық оқушыға бағыт-бағдар берілді. Жобаны әрі қарай жалғастыру жоспарда бар.
