Бүгін «Жастар тағылымдамасы» әлеуметтік жобасы жеңімпаздарының алғашқы легі Түркия мемлекетіне жолға шықты. Енді маңғыстаулық бес жас 7-12 қараша аралығында Түркия мемлекетінің жастарға арналған мүмкіндіктерімен және бағдарламасымен танысады.
Маңғыстау облыстық жастар саясаты мәселелері жөніндегі басқармасының басшысы Мұқаш Оралбай жеңімпаздарды шығарып салып, тағылымдамадан нәтижелі келуіне тілек білдірді.
– Жоба аясында жастар ҚР-ның Түркия Республикасындағы елшілігінің, «ТҮРКСОЙ» түркі мәдениетін және өнерін дамыту халықаралық ұйымының, «Türkiye Burslari» бағдарламасымен танысады. Сонымен қатар «Kızılay», «Yeşilay», «Türk Dünyası Araştırmaları Vakfı» және тағы басқа да ұйымдарға барады, – деді жоба жетекшісі Гауһар Шамқұлова.
Оған қоса қатысушылар Стамбұл мен Анкарадағы тарихи-мәдени орындарды аралайды.
Айта кетейік, «Жастар тағылымдамасы» әлеуметтік жобасы биыл екінші рет ұйымдастырылып отыр. Жобаны «Түпқараған жастары» жастар қоғамдық бірлестігі жүзеге асыруда.
Байқаудың мақсаты- өңірдегі жастардың кәсіби құзыретін дамыту, жаңа жас көшбасшыларды анықтау.
