«Тәуелсіздік ұрпақтар» гранты жеңімпаздарының бірі — Ғалиябану Мейрамқызы. Қазіргі таңда ол сурдопедагог мамандығы бойынша білім алып жатыр. Негізгі мақсаты – Ақтау қаласынан есту қабілеті зақымдалған балаларға арнап арнайы курс ашу, сурдопедагогтардың қызметін қолжетімді бағада халыққа ұсыну. Осы орайда Ғалиябану Мейрамқызы «Тәуелсіздік ұрпақтары» грантына қатысып, жобасын орындау үшін 1 млн теңге грант жеңіп алды.
Ғалиябану Мейрамқызының айтуынша, сенсорлық интеграция курсы ақпан айынан бастап ашылды. Ашылған күннен бастап 7 бала жазылып, қазір тұрақты жаттығу жүргізіп жатыр. Алдағы уақытта кәсіпті кеңейтіп, тағы да балаларды қабылдау жоспарда бар. Себебі сенсорлық интеграция курсына сұраныс көп.
«Сенсорлық интеграция курсының елге келгеніне 2-3 жыл ғана болған. Ал Ақтауда мұндай курстар саусақпен санарлық. Өкінішке қарай, елде есту қабілеті нашар дамыған балалар жиі туылып жатыр. Балалардың өмірге бейімділігін арттырып, оның дамуына үлес қосу ата-ана мен сурдопедагогтың – басты мақсаты», — дейді Ғалиябану Мейрамқызы.
Сенсорлық интеграция баланың сенсорлық қабылдауын дамытуға, яғни, тактильді, қолдың маторикасын, есту-көру анализаторын дамытуға септігін тигізеді. Осы курстан өткен соң міндетті түрде ата-анамен кері байланыс орнатылады. Бұл курстың ұтымдылығын, пайдасы мен баланың бойындағы өзгерісті тануда, саралауда өте маңызды екенін атап өтті.
