2025 жылдың 1 маусымынан бастап елімізде Президенттік жастар кадр резервіне кезекті іріктеу науқаны басталады. Осыған орай, бүгін Маңғыстау облыстық жастар ресурстық орталығында ҚР Мемлекеттік қызмет істері агенттігінің Маңғыстау облысы бойынша департаменті басшысының орынбасары Жасұлан Маршакұлының қатысуымен арнайы кездесу өтті. Кездесуде ол аталмыш бағдарламаға қатысу тәртібі мен талаптарын кеңінен түсіндіріп, жастарға маңызды ақпаратпен бөлісті.
Қатысу шарты бойынша президенттік жастар кадр резервіне қатысу үшін үміткер келесі талаптарға сай болуы тиіс:
• Қазақстан Республикасының азаматы болуы;
• Жасы 35-тен аспауы қажет;
• Жоғары білімі болуы;
• Кемінде 5 жыл жалпы жұмыс өтілі болуы тиіс;
• Мемлекеттік тілді B1 деңгейінен төмен емес меңгеруі қажет (QAZAQ RESMI TEST немесе KAZTEST сертификаты арқылы расталады).
Іріктеу қалай өтеді?
Іріктеу бірнеше кезеңнен тұрады және 2025 жылдың маусым-қазан айлары аралығында жүзеге асырылады. Нәтижесінде, ең үздік 50 кандидат Президенттік жастар кадр резервіне қабылданады.
Артықшылықтар:
Резервке енген азаматтар 3 жыл ішінде конкурстық іріктеуден өтпей-ақ түрлі мемлекеттік лауазымдарға тағайындалу мүмкіндігіне ие болады. Бұл – еліміздің болашақ басқарушыларына берілетін зор мүмкіндік.
Құжаттарды қалай тапсыру керек?
Өтінімдер 1-30 маусым аралығында pkrezerv.gov.kz сайтында қабылданады. Тіркелу үшін қажет:
• ЖСН мен электрондық пошта арқылы сайтқа тіркелу;
• Жоғары білім туралы дипломның көшірмесі;
• Еңбек қызметін растайтын құжат (ҚР Еңбек кодексінің 35-бабына сәйкес);
• Мемлекеттік тілді меңгеру сертификаты (B1 және одан жоғары деңгей).
Бағыттар:
Қатысушылар төмендегі алты бағыттың бірін таңдай алады:
1. Инфрақұрылымды, өнеркәсіпті дамыту және сауда саясаты;
2. Агроөнеркәсіптік кешен және қоршаған ортаны қорғау;
3. Сыртқы саясат және инвестициялар;
4. Экономикалық және қаржылық саясат;
5. Цифрландыру;
6. Әлеуметтік саясат және азаматтық қоғам.
Мемлекеттік тілді меңгеру сертификатын қайдан алуға болады?
Егер өтінім беру кезінде қолданыстағы тілдік сертификат болмаса, кандидаттар QAZAQ RESMI TEST немесе KAZTEST жүйесінде тегін тест тапсыруға мүмкіндік алады. Тестілеу Ұлттық тестілеу орталығы немесе Мемлекеттік басқару академиясы базасында онлайн өтеді. Промокод жеке пайдалануға беріледі.
Кері байланыс:
Сұрақтар туындаған жағдайда:
• Сайттағы Jivo чат арқылы;
• +7 700 096 70 74 нөміріне хабарласып;
• info@pkrezrv.gov.kz поштасына хат жолдау арқылы көмек алуға болады.
Анықтама үшін: Президенттік жастар кадр резерві – бұл жас қазақстандықтар үшін ел басқару ісіне тікелей араласудың нақты жолы. Еліміздің дамуына өз үлесін қосқысы келетін, білікті әрі талапты жастар үшін бұл – үлкен өмірлік және кәсіби мүмкіндік.
