Бүгін Маңғыстау облысының “Қоғамдық коммуникациялар орталығының” брифинг залында биыл жастар саясаты саласында жүзеге асатын бірнеше жобалар таныстырылды. Соның бірі – “Жастар керуені” жобасы.
Жоба Маңғыстау облысы Жастар саясаты мәселелері жөніндегі басқармасының тапсырысымен, «Азаматтық бастамаларды қолдау орталығының» ұйымдастыруымен және «Қолдау» орталығы» жеке меншік мекемесінің іске асыруымен жүзеге асады.
– Баршаңызға белгілі, бүгінгі мемлекеттік жастар саясатын жүзеге асыру аясында жас ұрпақтың толыққанды тұлғасын дамыту, бос уақытын тиімді ұйымдастыру, рухани сауықтыру және т.б. бағыттарда жүйелі жұмыстар жүргізіліп келеді. Жастардың өзін-өзі дамытуын әрі қарай қоғамның дамуына ұластыру аса маңызды. Жастардың өзін-өзі дамытуы дегенде бұл сауаттылықтардың деңгейімен өлшенеді. Бұлар: қаржылық, құқықтық, діни сауаттылықтар және отбасын берік негізде қалыптастыру болып табылады. Әлеуметтік жобамыздың мақсаты да осы – өңір жастары арасында қаржылық, құқықтық және діни сауаттылықтарды арттыру. Жастарға неке және отбасы құндылықтарын насихаттау бағытында кешенді ақпараттық және ағартушылық жұмыстарды ұйымдастыру”,- дейді жоба жетекшісі Еділбек Дүйсенов.
Аталған мақсаттарды жүзеге асыру үшін жеке меншік мекеме республикалық деңгейдегі сарапшыларды тарта отырып, арнаулы мақсаттар мен міндеттерге сай өңірдің барлық аудан, қалаларында іс-шаралар тізбегін, яғни көшпелі кездесулер сериясын өткізетін болады.
Негізгі нысаналы топ – Маңғыстау облысының тұрғындары, оның ішінде: 18-35 жас аралығындағы жастар, жасөспірімдер, колледж, университет студенттері.
Аталмыш жоба нәтижесінде діни түсініктің төмен деңгейін көтеру, жастардың бойындағы қаржылық және құқықтық иммунитетті күшейту, отбасы құндылықтарын насихаттау, некенің қоғамдағы рөлін айшықтау күтіледі. Жоба аясында республикалық деңгейдегі сарапшыларды тарту арқылы ақпараттық кездесулер, лекциялар мен жиындар өткізу жоспарланып отыр.