Елордадағы Бейбітшілік және келісім сарайында Халықаралық волонтерлар форумы өтті. Халықаралық волонтерлар форумына әлемнің 34 елінен 140-тан астам ерікті қатысып жатыр. Сонымен қатар 50-ге жуық шетелдік спикер келді.
Алғашқы күні Мемлекет басшысы Қасым-Жомарт Тоқаев форумға қатысып, еріктілердің қоғамда айрықша рөл атқаратынын айтты.
– Қазақстанда 2020 жыл еріктілер жылы болды, біраз шаруа атқарылды. Қазір еліміздегі волонтерлік ұйымдар саны 3 есе өсті, яғни 680 ұйым бар. Еріктілердің саны 200 мыңға жетті. Барлық аймақта фронт-офистер ашылды. Онда мыңдаған волонтер дайындықтан өтті. Qazvolunteer.kz платформасы жасалды. Яғни, бүгінгі таңда Қазақстанда кез келген адам еріктілер тобына мүше болып, пайдалы іске өз үлесін қоса алады. Сондай-ақ біздің волонтерлер Иордания, Кения, Таиланд және Түркия елдеріне арнайы барып, тәжірибе жинақтады. Осы тұста мен Қазақстан еріктілеріне қолдау көрсетіп жүрген Біріккен Ұлттар Ұйымының өкілдеріне алғыс айтамын, – деді Қасым-Жомарт Тоқаев.
Форумның негізгі мақсаты – волонтерлар қозғалысын дамыту және қолдау саласындағы қазақстандық тәжірибені таныстырып, халықаралық аренада елдің оң имиджін қалыптастыру.