17 қазан күні Достық үйінде Маңғыстау облыстық жастар ресурстық орталығының ұйымдастыруымен «TedX Mangystau» шарасы өтеді.
«TedX Mangystau» — арман мен мақсатқа, жақсылық пен ізденіске асыққан, қиындықты еңсеріп, күйзелістен қашқан жарқын жандардың ашық алаңы.
Осы орайда шараға «Жас тұлпар 2021» облыстық жастар премиясынан «Жыл белсендісі» номинациясының иегері, қайырымдылық шараларды ұйымдастырушы Әсемгүл Адамбай, «Biznes buket» гүлдер дүкенінің негізін қалаушы, «Үздік кәсіпкер» номинациясының иегері Бақтықожа Орысбаев, әнші, актриса Асылтас Аяп және жағажай волейболынан ҚР чемпионатының күміс жүлдегері, отырып ойнау волейболынан ҚР чемпионатының қола жүлдегері, ҚР спартакиадасының 3-орын иегері Қанат Ризабеков келеді. Сонымен қатар эстрада жұлдызы, әнші, маңғыстаулық Ғаділбек Жанай арнайы келіп, жастармен бірге бір толқында өнер көрсетеді.
Ұйымдастырушылардың айтуынша, «TedX Mangystau» болмысыңызды терең тануға, болаттай ерік-жігер сыйлауға, дамуға мүмкіндік береді. Осы жоба арқылы қоғамда жүрген батыл да батыр жандардың есімін көпке естіртеді.
Шара сағат 15:00-де басталады.
