25 маусымда Ақтаудағы «Амфитеатр» алаңында ерекше форматта өтетін білім беру іс-шарасы – «EDU FEST MANGYSTAU – 2025» оқу орындар жәрмеңкесі өтеді.
Аталған жәрмеңке Маңғыстау жастарына, әсіресе мектеп бітіруші түлектер мен олардың ата-аналарына еліміздің жетекші жоғары және кәсіптік-техникалық білім беру ұйымдары туралы кең, сапалы әрі қолжетімді ақпарат ұсынып, кәсіби бағдар таңдауда қолдау көрсету мақсатында ұйымдастырылмақ. Сонымен бірге, оқушылар мен талапкерлердің қызығушылығы мен қабілетіне, сондай-ақ еңбек нарығының сұранысына сай мамандық пен оқу орнын саналы түрде таңдауға мүмкіндік беретін тиімді алаң ретінде маңызды болып отыр.
«Іс-шара аясында қатысушылар жоғары оқу орындары мен колледждердің білім беру бағдарламаларымен танысып, қабылдау шарттары, гранттар мен жеңілдіктер туралы нақты ақпарат ала алады. Сондай-ақ, мамандармен тікелей сұхбат арқылы көкейдегі сауалдарға жауап алып, кәсіби бағдарлау кеңестеріне ие болады. Жәрмеңке шалғай ауылдар мен әлеуметтік аз қамтылған отбасылардан шыққан жастарға тең мүмкіндік беруді көздейді», – деді облыстық жастар ресурстық орталығының директоры Гүлмира Бурхандинова.
«EDU FEST MANGYSTAU – 2025» жәрмеңкесіне еліміз бойынша отыздан астам жоғары және кәсіптік-техникалық оқу орындары қатысады. Ашық аспан астында өтетін білім беру алаңы аясында әр оқу орнына жеке стенд аймақтары бөлініп, LED-экран мен сахнада мазмұнды бағдарламалар ұсынылады деп күтілуде. Сонымен қатар, интерактивті сұхбат алаңдары, DJ-сет, фотозоналар мен селфибокс, жастарға арналған креативті кеңістіктер де қарастырылған.
