Ақтаудағы Серікбай Қондыбай атындағы №22 мектеп-гимназиясының 9-сынып оқушылары Hi Tech Furniture жиһаз цехына экскурсия жасап, кәсіпорынның жұмысымен танысты. Іс-шара Президент Қасым-Жомарт Тоқаевтың 2024 жылды «Жұмысшылар жылы» деп жариялауына орай ұйымдастырылып отыр.
Экскурсияны Маңғыстау облыстық жастар ресурстық орталығы қолға алып, оқушыларға қол еңбегімен айналысатын мамандықтардың маңыздылығын көрсету, еңбек нарығында сұранысқа ие кәсіптер туралы ақпарат беру мақсатында өткізді.
Жиһаз цехына барған 20-ға жуық оқушы өндіріс орнындағы жұмыс барысын өз көздерімен көріп, кәсіпорын қызметкерлерінің тәжірибесінен үлгі алды. Оқушыларға ағаштан жиһаз жасау процесі, заманауи құрал-жабдықтардың жұмысы және кәсіптің қыр-сыры түсіндірілді.
Цех басшылығы жиһаз өндірісінің бүгінгі еңбек нарығындағы маңыздылығын атап өтіп, оқушылардың қызықтырған сұрақтарына жауап берді. Кейбір оқушылар кәсіпке ерекше қызығушылық танытып, өз болашақтарын осы салаға арнау мүмкіндігін қарастыруға ниет білдірді.
Цех басшысының айтуынша, жазғы демалыс кезінде оқушылар үшін арнайы жұмыс орындары қарастырылмақ. Бұл бастама арқылы жастар еңбек тәжірибесін жинап, алғашқы табыстарын табуға мүмкіндік алады. Оқушыларға күрделі емес, өз қолдарынан келетін тапсырмалар беріледі, осылайша олар еңбек нарығының алғашқы баспалдағын аттай алады.
Маңғыстау облыстық жастар ресурстық орталығы Жұмысшылар жылы аясында жастарды қол еңбегі мамандықтарына қызықтыру мақсатында осындай экскурсияларды жиі ұйымдастыруды жоспарлап отыр. Бұл бастама жастардың ерте жастан кәсіптік бағдар алуына, еңбекке деген ынтасын арттыруға және болашақ мамандығын дұрыс таңдауына ықпал етуге бағытталған.
Мұндай іс-шаралар еңбек нарығындағы сұранысқа ие мамандықтарды кеңінен таныстырып, оқушылардың жұмысшы мамандықтарына деген қызығушылығын оятуға көмектеседі. Жастарды еңбекке баулу және кәсіпке бағыттау – ел болашағы үшін маңызды қадам.
Жиһаз өндірісі, құрылыс, дәнекерлеу, механика сияқты салалар бүгінгі таңда аса қажет мамандықтардың қатарында. Сондықтан мұндай кәсіптік бағыттағы экскурсиялар жас буынға өз болашағын дұрыс таңдауға мүмкіндік береді.
Маңғыстау облыстық жастар ресурстық орталығы алдағы уақытта да жастардың кәсіптік бағдарын дамыту мақсатында осындай шараларды жалғастыра бермек.
