Назарбаев Зияткерлік мектептері арасында өткен тоғызқұмалақтан желілік жарыста ақтаулық зияткерлер үздік көрсеткішке ие болды, деп хабарлайды mangystauzhastary.kz сайты Қоғамдық коммуникация орталығына сілтеме жасап.
PlayOk платформасында 2023 жылдың 30 қазан және 1 қараша аралығында қашықтан өткен желілік спартакиадаға NIS пен Астана халықаралық мектебінен 94 оқушы қатысты.
Командалық есепте Ақтаудағы Зияткерлік мектептің құрамасы 10-12 сыныптар арасында Жансая Жәрдем және Есбол Азан желілік спартакиадада жүлделі І орынды иеленіп 2023 жылдың чемпиондары атанды. Ал, Назерке Жәрдем мен Жанарыс Тілеуқұл 7 – 9 сыныптар арасында ІІІ орынға ие болды.
7 – 9 сыныптардағы қыз балалар арасында жарыста Назерке Жәрдем ІІІ орынға ие болды.
10 – 12 сыныптағы қыз балалар арасында I орын 11-сынып оқушысы Жансая Жәрдемге бұйырды.
– Биылғы жарысқа дайындығымыз жоғары деңгейде болды. Сондықтан үздік нәтиже көрсеттік,-дейді тоғызқұмалақтан республикалық жарыстардың жеңімпазы Жансая Жәрдем
Жансая бұған дейін Тараз қаласында өткен тоғызқұмалақтан XI жазғы Қазақстан оқушылар Гимназиадасында 2- орын алса, Маңғыстау облысында өткен С.Тілегеновты еске алуға арналған тоғызқұмалақтан республикалық жарыста жеңімпаз атанды.
– Оқушылардың тоғызқұмалаққа деген қызығушылығы өте зор. Ұлттық ойынымызды жастар арасында дәріптеуде мұндай жарыстардың маңызы зор,-дейді тоғызқұмалақтан Қазақстан Республикасының халықаралық дәрежедегі спорт шебері Марат Бекбаулы
Спартакиаданың басты мақсаты- тоғызқұмалақ ұлттық ойынын мектеп оқушылар арасында насихаттау. Бұл ұлттық ойын түрі оқушының логикалық ойлау қабілетін арттыруға, сыни ойлауға көмектеседі.
Айта кетейік, 2020 жылдың соңында тоғызқұмалақ ЮНЕСКО-ның Әлемдік мұра нысандарының тізіміне енгізілді.
