Су тасқынынан зардап шеккендерге Маңғыстаудан көмек көрсетіледі

Елде су тасқынынан зардап шеккендерге көмек көрсету мақсатында Жастар ресурстық орталығында гуманитарлық көмек жиналып жатыр. Бұл туралы Қоғамдық коммуникация орталығында өткен брифингте Маңғыстау облыстық жастар ресурстық орталығының басшысы Гүлмира Бурхандинова айтты.

– Жастар орталығы жанынан гуманитарлық көмек қабылдау бекетін аштық. Ол жерге қаржылай емес, киім-кешек, гигиеналық заттар, азық-түліктер жинайтын боламыз. Тапсыратын киімдер таза, азық-түліктердің мерзімі өтпеген болуы тиіс, – деді Гүлмира Бурхандинова.

Әлеуметтік желіде бейресми шоттардың көп ашылғаны туралы айтып, халыққа ресми жарияланған реквизиттер арқылы ғана көмек көрсетуге кеңес берді.

Осы орайда облыстың Қоғамдық кеңесі ресми реквизит жариялады.

– Қазір отандастарымыз үй-жайынан, мал-мүліктерінен айырылып, басқа жерге қоныстануға мәжбүр болып отыр. Сондықтан осы қиын жағдайда халыққа қол ұшын созу – әрқайсымыздың азаматтық парызымыз. Осыған байланысты Маңғыстаудан арнайы қаржылай көмек үшін шот ашуды жөн көрдік. Облыста жиналған қаржыны зардап шеккен аймақтарға көмек көрсету мақсатында ашылған республикалық қорға жібереміз. Өйткені, республикалық қорға қай өңірге қанша қаражат керек екені белгілі. Оны әрі қарай тиімді пайдалануға және қаражат есебінің қайда жұмсалғаны туралы халыққа есеп беруге дайынбыз, – Маңғыстау облысы қоғамдық кеңесі төрағасы Оңайбек Әбділов.

Айта өтейік, су тасқынынан зардап шеккен отандастарымыз үшін материалдық және гуманитарлық көмектерді қабылдайтын бекеттер тәулік бойы жұмыс істейді.

Реквизит:
БИН 061040004608
Шот KZ6094811KZT22030059
АО Евразийский банк
БИК EURIKZKA

Байланыс үшін: 8 (7292) 30-21-21, 8 (777) 751 72 11

Exit mobile version