6 тамыз күні теңіз жағалауында тоғызқұмалақтан облыстық ашық чемпионат өтеді. Чемпионат «Ұлттық құндылық – ұлттың қазынасы» жобасы және «Jastar Week» апталығы аясында ұйымдастырылады, – деп хабарлайды mangystauzhastary.kz сайты.
«Жеті жұрт» ҚБ жетекшісі Гүлназ Жеңісқызының айтуынша, тоғызқұмалақ адамның ой-санасын шынықтыруға, мидың жұмыс істеу қабілетін арттыруға мүмкіндік береді. Сонымен қатар қатысушылардың зияткерлік шеберлігін шыңдайды. Сондықтан жастар арасында ұлттық ойынды насихаттап, қызығушылығын, бұқаралық сипатын арттыру – басты мақсат.
– Ашық чемпионатқа 15-25 жасқа дейінгі және 25-35 жасқа дейінгі ерлер және қыздар (әйелдер) қатысады. Ерлер мен әйелдер бөлек сынға түседі. Жарыс реттелмелі-айналмалы жүйемен блиц бойынша өтеді. Әр ойыншыға блиц 5 минут +2 секунд беріледі. Жалпы жүлде қоры – 800 000 теңге. Әр категория бойынша бірнеше жеңімпаз анықталады және бағалы сыйлықтар, сертификаттарға ие болады. Жарысқа қатысушылар 6 тамыз күні сағат 11.00-ге дейін тіркелуі тиіс. Тіркелу үшін 8 705 970 18 08 нөміріне хабарласуы керек, – дейді «Жеті жұрт» ҚБ жетекшісі Гүлназ Жеңісқызы.
Айта кетейік, тоғызқұмалақтан ашық чемпионатты «Жеті жұрт» қоғамдық бірлестігі облыстық жастар саясаты мәселелері жөніндегі басқармасының тапсырысымен, Азаматтық бастамаларды қолдау орталығының қолдауымен өткізеді.