Ақтау қаласында Маңғыстау облысының жастар ресурстық орталығының ұйымдастыруымен ерекше форматтағы іс-шара өтті. Теңіз жағалауында өткен бұл шара «Мен Маңғыстауды не үшін жақсы көремін?» атауымен сауалнама ретінде ұйымдастырылып, өңір тұрғындары өз туған өлкесіне деген сүйіспеншіліктерін білдіруге мүмкіндік алды.
Сауалнама барысында тұрғындар Маңғыстау өңірінің табиғаты, тарихы, мәдениеті мен бірегейлігі туралы пікірлерін ашық айтып, туған жерге деген құрметтерін білдірді. Қатысушылардың басым бөлігі аймақтың бай тарихи мұрасын, Каспий теңізінің сұлулығын, даласы мен тауларының ерекше атмосферасын мақтан тұтатындарын атап өтті.
Ұйымдастырушылардың айтуынша, бұл жоба әрбір азаматтың туған жерге деген сүйіспеншілігін арттырып, жастар арасында патриоттық сезімді қалыптастыруды көздейді.
«Мақсатымыз — өңір тұрғындарының Маңғыстауға деген шынайы сезімдерін жеткізіп, олардың ой-пікірлері арқылы болашақта жастарға бағыт-бағдар беру. Туған жерді сүю — елді сүюдің бастамасы, — деді жастар ресурстық орталығының өкілі Жаннұр Оразова.
