«Таза Қазақстан» республикалық экологиялық науқанының 3-кезеңі «Жасыл аймақ» аптасында облыс бойынша 2000-ға жуық ағаш отырғызылады.
Бұл туралы Қоғамдық коммуникация орталығында өткен брифингте табиғи ресурстар және табиғат пайдалануды реттеу басқармасының басшысы Әсел Балманова хабарлады.
Спикердің айтуынша, облыс бойынша жалпы халықтық көктемгі сенбілік жұмыстары басталғалы 12900-ден астам ағаш отырғызылып, 49 саябақта жасыл желекті көбейту және күтіп ұстау, қорын молайту бойынша жұмыстар жүргізілуде.
– 20-27 сәуір аралығында «Таза Қазақстан» науқаны шеңберінде Ақтау қаласында – 250, Жаңаөзен қаласында – 480, Мұнайлы ауданында – 600, Маңғыстау ауданына – 150, Бейнеу ауданында – 150, Түпқараған ауданында 150, Қарақия ауданына – 150 ағаш отырғызу жоспарланып отыр, – деді Әсел Балманова.
Сондай-ақ, Ақтау қалалық тұрғын-үй коммуналдық шаруашылығы бөлімінің басшысы Жанболат Жақыпов жалпы 2022 жылдан 2027 жылға дейін 5 жыл мерзімге жалпы құны 7,1 млрд. теңгені құрайтын Ақтау қаласын көгалдандыру бойынша мемлекеттік-жекешелік әріптестік қағидатына көшу туралы шешім қабылданып, «Green City Aktau» ЖШС-мен №1 келісім-шарт жасақталғанын мәлімдеді.
– Жоба аясында жапырақты ағаштардан 20 905 дана, қылқан жапырақты ағаштардан 11 750 дана, сәндік бұталардан 1 460 дана, бұталардан 24 000 , көгалдардан 5 000 шаршы метр, гүлзарлардан 652 500 дана, раушан гүлдерінен 18 000 дана егу жоспарланған. 2024 жылы жасыл желектер аумағын көбейту мақсатында қала аумағына 7231 ағаш, 4 000 шаршы метр бұта, 300 дана сәндік бұта, 900 шаршы метр раушан гүлдер, 1000 шаршы метр, көгал 3 182 шаршы метр біржылдық гүлдер егу жоспарланған. Қазіргі таңда жоспарға сәйкес, 800 жапырақты ағаш, 900 қылқан жапырақты ағаш, 1300 раушан гүл, 5700 дана бұта отырғызылды, – деді Жанболат Жақыпов.
Сонымен қатар, брифинг барысында қазіргі таңда облыс бойынша ағаштарды есепке алу мақсатында құны 107 млн теңге болатын дендрологиялық жоспар жасақталып жатқаны жөнінде айтылып өтті. Маңғышлақ эксперименталды ботаникалық бағы директоры Ақжүніс Иманбаева Қазақстанда бірінші рет өсімдіктердің көгалдандыруына мониторинг жүргізу енгізіліп, үш жылдан бері Ақтау қаласы бойынша мониторинг жүргізіп келе жатырғанын тілге тиек етті.
– Былтыр наурыз айынан бастап жасыл желектердің жағдайын, олардың биологиялық ерекшеліктерін, жалпы урбанизацияланған аумақта өсетін өсімдіктердің биологиясына сипаттама бітіріп, жай күйін көрсететін дендрологиялық жоспар жасақталсын деген пункт енгізілді. Қала бойынша соңғы 2 жылда тиянақты жұмыстың арқасында қылқанжапырақты ағаштар 4600 ден 10000 ға дейін өсті. Ағаш тектес өсімдіктер де 30%-ға дейін өсті. Дендра бойынша 5 жылға жоспар жасақтадық. Дендрологиялық карта жоспарлы түрде жұмыс жасау үшін қажет. Ағаштардың, гүлдердің нақты қай жерге егілу керектігі жөніндегі факторлар ескеріліп, экологиялық картада көрсетіледі. Оны кез келген уақытта, кез келген жерде қарауға болады. Біздің мақсатымыз – жалпы жасыл желектің жағдайы дұрыс болып, халықтың игілігіне қолданылуына жағдай жасау, – деді Ақжүніс Иманбаева.