Бүгін Маңғыстау облыстық жастар ресурстық орталығының ұйымдастыруымен «Кешкі шай» жобасы өтіп жатыр. Жоба аясында облыс тұрғындарына арнап кітап жәрмеңкесі және bookcrossing ұйымдастырылып жатыр.
Жәрмеңкеге қаладағы кітап дүкендері, атап айтқанда @aktau.jahan @books.aktau.liza @kitapalike @kitap_al_mangystau @zharykka_umtyl @abooks_aktau келіп, тиімді бағада кітаптарды сатып жатыр.
– Жәрмеңке аясында жастар қазіргі заман көркем әдебиетін, мотивациялық және психологиялық кітаптарды сатып алуда. Жәрмеңке басталғалы 50-ден аса кітап сатылды, әлі де қызығушылық танытып, сатып алып жатқандар көп, – дейді @abooks_aktau дүкенінің иесі Айжан.
Ал кітап алмасуға 50 жуық адам қатысқан.
– Bookcrossing шарасында «Саңлақ сахабалары» деген кітапты «Маркетинг» деген кітапқа алмастырдым. Бұл кітап менің бизнесімді дамытуда көмегін тигізеді деген ойдамын, – дейді қала тұрғыны Мөлдір Оңғарбаева.
Айта кетейік, аталған шара 12 тамыз Халықаралық жастар күніне орай ұйымдастырылған «Jastar Week» жастар апталығы аясында өтіп жатыр.
Жұлдызай ҚАЛИЕВА
Суреттерді түсірген Ақерке ГАГАРИНҚЫЗЫ
