«Ақтау студенттер Альянсының» студенттік базасына енген белсендінің бірі – Болат Ықылас Дулатұлы. Қазіргі таңда ол Қарақия кәсіптік колледжінде IT саласы бойынша 2-курс оқиды.
Болат Ықылас бос уақытында спортпен шұғылданғанды ұнатады. Оның айтуынша, спорт – өмірге деген белсенділікті арттырып, мақсатқа жетуге күш сыйлайды.
– Бос уақытымда теннис, баскетбол ойнаймын, кітап оқығанды ұнатамын. Ал бокстан түрлі спорттық жарыстарға қатысып, жүлделі орындарға ие болып жүрмін. Студенттік кезең – өмірімнің ең тәтті кезеңі. Себебі дәл осы кезең менің қабілетімді одан әрі шыңдап, шыңдала түсуіме көмектесуде, – дейді студент Болат Ықылас.
Болат осы уақытқа дейін спорттық жарыста бірнеше рет көш бастаған. Айтуынша,бокстан облыстық чемпионатта 7 мәрте, республикалық жарыста 4 мәрте, халықаралық жарыста 2 рет, Батыс-аймақ чемпионатында 1 рет жеңімпаз атанған. Сонымен қатар спорт шеберлігіне үміткер.
Оған қоса колледж қабырғасында да белсенділік танытып, Жігіт сұлтаны – 2023, Жас сарбаз жарысының және АК74 қаруын жартылай бөлшектеп жинау сайысының жеңімпазы атанған. «Дала» оқу-жаттығу жиынның рота командирі болған.
Болат Ықылас мамандығы IT-саласындағы мүмкіндіктерге сенеді.
– IT-мамандығын тандаған себебім – жоғары төлемақы, мамандықтар арасындағы ең көп сұранысқа ие болады. Кейде жоғары білім болмай-ақ жұмысқа тұру мүмкіндігі бар. Сондай-ақ уақытты ұтымды пайдаланып, қашықтан жұмыс істеуге де ыңғайлы. Бір сөзбен айтқанда, болашағымыз IT саласының дамуымен тікелей байланысты. Сондықтан білім алып, таңдаған мамандығым бойынша жетістікке жету – басты мақсатым, – дейді Қарақия колледжінің студенті Болат Ықылас.
