Жаңаөзендік спортшылар бокстан өткен халықаралық турнирден жеңіспен оралды. Спорттық дода Астана қаласында 30 қыркүйек пен 2 қазан аралығында өтті.
«Qarabatyr Bоxing Championship» турнирі жас және кіші жасөспірімдер арасында өтті. Турнирге Қазақстанның әр түкпірінен және Қырғызстан, Өзбекстан, Ресейден 700-ге тарта спортшы қатысты. Бұл жарыс еліміздегі «Балалар жылына» орай ұйымдастырылған.
Жарыс нәтижесінде 105 команданың ішінен Маңғыстау облысы І-орынды иемденді. Жеңімпаздар кубок, чемпиондық белбеу, дипломдармен марапатталды.
-Жаңаөзен қаласындағы №2 балалар мен жасөспірімдер спорт мектебінен 15 спортшы барды. 5-і І орын, 10-ы ІІІ орын иемденіп, бәрі де жүлдемен оралды. Біз үнемі жаттығуда жүреміз. Себебі, турнирлерге әрқашан дайын болу керек. Біздің мақсат – осындай халықаралық жарыстарда Қазақстанның атын шығаратын спортшылар дайындау. Сол үшін кішкентай кезінен спортқа баулыған дұрыс. Негізі боксқа 7-8 жастан бастап қатысуға болады. Себебі боксқа қара күшпен қатар, ой жаттығуы да керек деп айтар едім. Боксқа қызығушылығы бар кез келген балаға тек құлшыныс пен ерік-жігер керек, – деді чемпиондардың жаттықтырушысы Әскер Қайырлиев.
Жүлделі орынға ие болған спортшыларды қала әкімінің орынбасары Жаңабай Аймағамбетов және қалалық спорт бөлімінің басшысы Қания Төрткулова, №2 БЖСМ басшысы Берік Ахметов күтіп алып, арнайы құттықтады. Сондай-ақ, спортшылардың ата-аналары да келіп, жылы лебізін білдірді.