Жаңаөзендегі «Мұнайшы» мәдениет үйінде қала күніне орай «Бір ауыл – бір өнім» атты қолөнер шеберлерінің көрмесі өтті.
10-12 қазан аралығында өткен көрменің бірінші күні мектеп оқушылары, екінші күні студенттер, үшінші күні кәсіпкерлер өздерінің төл туындыларын, ұлттық нақышты дәріптейтін бұйымдарын қала тұрғындарына ұсынды.
Алуан түрлі және көздің жауын алатын, қайталанбас қолөнер туындыларына арналған көрмеде қала әкімінің орынбасары Ғалым Байжанов алтын қолды ісмерлерге әрқашан ұлттық өнерді дамыту керек екендігін айтып, жұмыстарына сәттілік тіледі.
-Атадан балаға мирас болып келе жатқан қолөнерді қолдау, насихаттау мақсатында көрме ұйымдастырылды. Біздің негізгі мақсатымыз ұлттық өнерді насихаттау және дамыту. Ісмерлікпен шұғылдану барлық адамның қолынан келе бермейді. Бұл іспен он саусағынан өнер тамған, қолының ебі бар адамдар ғана айналыса алады. Қолөнер шеберлерінің туындылары әрқашанда жоғары бағалануы тиіс. Өйткені шеберлер кез-келген туындыны жасаған кезде көз майын тауысып, көп уақытын арнайды. Біздің қолөнер туындыларына шетел азаматтары да қызығады. Сондықтан ұлттық өнерді өзге ұлттарға да насихаттау керек, – деді қала әкімінің орынбасары Ғалым Байжанов.
