Алматы қаласында өткен республикалық «Жұлдыздар мен ұл-қыздар» балалар мен жасөспірімдер арасындағы өнер байқауында жаңаөзендік оқушылар жеңіспен оралды.
Байқауды «Ai Media” продюсерлік орталығы «Аспап», «Дәстүрлі ән» жанры бойынша ұйымдастырса, «ӨНЕР» мемлекеттік коммуналдық қазыналық кәсіпорын жанынан құралған үйірме оқушылары қатысқан бұл байқауда бағы мен бабы қатар жанды. Жүлделі орынға ие болған жаңаөзендік Гүлжайна Марқабай, Инабат Серік, Аяна Қуанышқызы – Бас жүлде, Кәусар Марқабай, Фариза Базарбай, Нұрсұлтан Айладыр – І орын, «Домбыра дастан» тобы – ІІІ орын иеленіп қуантуда.
– Байқауға Жаңаөзен қаласы бойынша барлығы 24 оқушы апардым. Дәстүрлі ән жанр бойынша қатысқан “Нарқыз” тобы “Ауылың сенің іргелі” әнін, “Домбыра дастан” тобы Ешнияз салдың “Дүрдараз” әнін орындады. Сондай-ақ, жеке орындаушы ретінде де, дуэт болып та қатыстық. Қатысушылардың барлығы да жүлдемен оралды, – деді жетекшісі Дәмегүл Ізбасарова.
Сондай-ақ, 10 қарашада КТК арнасында өтетін «Жұлдыздар мен ұл-қыздар» концертіне де жолдама алған.
