Түпқараған аудандық спорт кешенінде «Балалар жылына» орай дзюдо күресінен 2009-2010, 2012-2013 және 2014-2015 жылдары туған жасөспірімдер мен балалар арасында «Aq-Ketik sports open» IІI ашық турнирі өтті.
Аймақтық деңгейде өткен турнирдің ашылу салтанатына Түпқараған аудандық ішкі саясат, тілдерді дамыту, мәдениет және спорт бөлімінің басшысы Шолпан Нұрғалиева қатысып, жас спортшыларға сәттілік тіледі.
– Спортқа деген қызығушылығы бар осынша бүлдіршіндерді көріп, спорттың бұқаралық сипат алғанына, жастардың салауатты өмір салтына кең көлемде көшкеніне сенім білдіріп отырмыз. Біз ауданымызда дзюдо спортының кең көлемде дамып келе жатқанын түрлі додаларда топ жарып жүрген спортшыларымыздың жетістіктері арқылы көреміз. Бүгінгі додаға қатысушы бүлдіршіндердің баршасына сәттілік тілейміз. Ұйымдастыруға мұрындық болған ел азаматтарына алғыс айтамыз, – деді Шолпан Нұрғалиева.
Ашылу салтанатында сонымен қатар Форт-Шевченко қаласының әкімі Бауыржан Молдабеков, спорт ардагері Қуантқан Төлегенов құттықтау сөз сөйледі. Шара барысында дзюдо спортына өзіндік үлесін қосып жүрген бірқатар азаматтарға аудан әкімінің атынан алғыс хат табысталды.
Турнирге Маңғыстау және Атырау облысынан 500-ден астам жас дзюдошы 23 салмақта бақ сынады.
Айта кетейік, аталған турнир осымен үшінші рет ұйымдастырылып отыр. Алғашқы турнирді Форт-Шевченко қаласының 1983 жылы туған азаматтары ұйымдастырған болса, екінші турнирді 1981 жылғы азаматтар ұйымдастырды.
Кезекті үшінші турнирді ұйымдастырып отырған 1982 жылы туған ел азаматтары келесі кезекті эстафетаны 1980 жылы туғандарға берді. Турнир ұйымдастырушылары, эстафета осылай жалғаса беретіндігін, турнир дәстүрлі түрде өтетіндігін айтады.
