Маңғыстаулық шабандоздар «Ұлы Дала Жорығы» атты тұңғыш республикалық ат марафон-бәйгесіне аттанды. Бұл – еліміздің 6 өңірін (Нұр-Сұлтан қаласы, Ақмола, Қарағанды, Ұлытау, Қызылорда, Түркістан облыстары) қамтитын тұңғыш жалпыреспубликалық ат марафоны.
17 қыркүйекте елордадағы «Қазанат» ипподромында 100 шабандоздың қатысуымен марафонның салтанатты ашылуы өтеді. 18-29 қыркүйек аралығында марафоншылар елордадан Түркістан қаласына дейін 1200 шақырымнан аса қашықтықты басып өтпек.
Республикалық бәйге федерациясы Маңғыстау облыстық филиалының президенті Алдаберген Ұзақбаевтың айтуынша, 12 күндік аламан жарыс, марафон-бәйге жобасына Маңғыстау облысынан 10 ат 5 шабандоз қатысады. Шабандоздар Ербол Ермағамбетов, Руслан Дүйсенбай, Нұрсағын Тұқымбай, Батырбек Қамысбаев, Әбіш Етреков. Маңғыстаулықтар өңір намысын қорғайтын шабандоздарға Қарақия ауданынан бастап қонақасын беріп, жолдан Маңғыстау ауданы Шетпе ауылынан бас қосып, одан кейн Бейнеу ауданынан күтіп алды. Әр аудан әкімі мен аудан азаматтары сый-құрмет көрсетіп, ақсақалдар батасын беріп шабандоздарға шығарып салу рәсімін жасады.
«The Great Steppe Tour» Нұр-Сұлтан қаласынан бастап Ақмола облысы, Қарағанды облысы, Ұлытау облысы, Қызылорда облысымен өтіп Түркістан облысының Түркістан қаласына ат басын тірейді.
Бұл ретте соңғы меже – Түркістан қаласына дейін ең қысқа уақыт ішінде жеткен команда мүшелері бас жүлде – «Ұлы Дала Сарбазы» атағы мен 30 млн теңге көлемінде жүлдемен марапатталады. 2 және 3-орын иегерлері сәйкесінше 20 млн және 15 млн теңге жүлделерімен марапатталады.
Жобаның мақсаты – Қазақстанмен тікелей байланысты танымал бренд құру және ұлттық мәдениетті халықаралық аренада ілгерілету, жастарды ұлттық мәдениет пен тарихты зерделеуге баулу, спорттағы шеберлік пен төзімділік құндылықтарын дарыту, – делінген министрлік хабарламасында.
Марафон 100 шақырымдық 12 сатыға бөлінген. Оған еліміздің әрбір өңірінен 1 командадан қатысады.
