Маңғыстауда кәсіпкерлік бастамалар байқауына 21 бен 35 жас аралығындағы жастардан өтінімдер қабылдау басталды. Байқау жеңімпаздары жылдық 2,5 пайызбен 5 миллион теңгеге дейін шағын несие ала алады.
Кәсіпкерлік бастамалар байқауына қатысу үшін Аграрлық несие корпорациясының Маңғыстау облысы бойынша филиалына хабарласып, өтініш беру керек. Өтінімдерді қабылдау 2023 жылдың 1 сәуірінен басталды және жыл соңына дейін жалғасады.
– Биыл 163 адамға қолдау көрсетуді жоспарлап отырмыз. Оларға жылдық 2,5 пайызбен 5 миллион теңгеге дейін тиімді несиелер ұсынылады. Бүгінгі таңда үміткерлерден 14 өтініш келіп түсті. Облыс әкімінің өкімімен бизнес жобаларды іріктеу комиссиясы құрылды. Тексерілген агент ретінде Аграрлық несие корпорациясы анықталды, – дейді Маңғыстау облысының жұмыспен қамтуды үйлестіру және әлеуметтік бағдарламалар басқармасының басшысы Әсет Шопанов.
Бизнестің барлық түрлеріне несие беру мерзімі – 5 жыл. Тек мал шаруашылығына қатысты жобалар үшін 7 жылға дейін беріледі. Негізгі шарт – несие алушының жасы 21 мен 35 аралығында және міндетті түрде кепіл болуы шарт. Сонымен қатар несие алғысы келетіндер жеке кәсіпкер ретінде 5 жылдан аспайтын мерзімде тіркелуі тиіс.
Шағын несие алу үшін құжаттар тізімі:
– Шағын несие алуға өтініш
– жеке басын куәландыратын құжат
– несиелік тарих туралы ақпаратты кредиттік бюроға беруге келісімі
– Бизнес жоспар
– қатысушының/өтініш берушінің уәкілетті органының микрокредит алу, мүлікті кепілге қою мәмілесін бекіту туралы шешімі.
– Кепіл берушілердің мүлікті кепілге беру жөніндегі келісімі
– шоттың болуы туралы қызмет көрсететін банктен анықтамалар
– несиелік берешектің, оның ішінде қаржы ұйымдарынан мерзімі өткен берешектің болуы туралы анықтамалар (қарыз болған жағдайда)
– қатысушының/үміткердің жалақысын және (немесе) өзге де кірісін растайтын құжат (жинақтаушы зейнетақы қорынан үзінді көшірме)
– Бағалау туралы есеп
– Кепіл беруші және кепілмен қамтамасыз ету жөніндегі құжаттар
Сұрақтар бойынша келесі мекенжайға хабарласа аласыз: Аграрлық несие корпорациясының Маңғыстау облысы бойынша филиалы,
29 шағынаудан, 225 ғимарат, «Сұлтан» бизнес орталығы, 3 қабат.
+77010061318
info-aktau@agrocredit.kz
