Испания елінің Аликанте қаласында өтіп жатқан бокстан жастар арасында Әлем чемпионатында маңғыстаулық Әсем Таңатар қола жүлде жеңіп алды.
Әлем чемпионатына 73 мемлекеттен 596 спортшы қатысуда. Қазақстан құрамасынан ерлер тобында 13 және қыздар тобында 12 спортшы ел намысын қорғауда.
Ұлттық құрама сапында өнер көрсеткен маңғыстаулық Әсем Таңатар – 63 келі салмақта Әлем чемпионатының қола жүлдегері атанды.
Асемнің жеке бапкері, қыздар арасында Маңғыстау облысының бокс спорт түрінен аға жаттықтырушысы Дияс Есеновтың айтуынша, алғашқы жекпе-жегінде Әсем Украина елінің боксшысы Юлия Флипованы 5:0 есебімен жеңді. Екінші кездесуінде неміс спортшысын тағы да 5:0 есебімен ұтты. Ал, жартылай финалдық кездесуде үндістандық спортшы Равина Равинаға есе жіберді.
Әсем Таңатар Дияс Есенов пен Дулат Букебаевтың шәкірті. Қазіргі таңда Мұнайлы ауданындағы №11 жалпы білім беру орта мектебінің 11-сынып оқушысы, Маңғыстау бокс құрамасының спортшысы.
