5 қараша күні Астана қаласында Жақсылық Үшкемпіров атындағы «Жекпе-жек» сарайында қазақ күресінен өткен республикалық турнирде маңғыстаулық Нұрдаулет Жарылғапов 100+ салмақ дәрежесінде «Дала қыраны» титулын жеңіп алды.
Имидждік додада ҚР чемпионаты, ҚР кубогы және рейтингтік жарыстарда 8 салмақ дәрежесі бойынша ең жоғары ұпай жинаған балуандар сынға түсті.
-Нұрдаулет 3 белдесу өткізіп, алғашқы белдесулерінде Алматы қаласының спортшысы Жансерік Жұмабайды және қарағандылық Сержан Бейсенбаевты ұтса, ақтық кездесуде Алматы облысының спортшысы Мади Еділбаевтан басым түсті, – дейді Нұрдаулеттің жеке бапкері, МО ұлттық спорт түрлері орталығының директоры Қайрат Бурбасов.
Жарыстың 8 жеңімпазы «Дала қыраны» титулы мен өз салмағының «Бас балуаны» атағына ие болды. Сондай-ақ, оларға желтоқсан айында елорда да өтетін Әлем чемпионатына жолдама және қаржылай сыйақы табысталды.
