Маңғыстау облысында «Балалар жылы» аясында 271 мыңнан аса бала түрлі шаралармен қамтылған. Бұл туралы Маңғыстау облыстық білім басқармасының адамгершілік-рухани тәрбие және өзін-өзі тану бөлімінің басшысы Құралай Ғазимова хабарлады.
Оның айтуынша, білім саласында жоспарға сәйкес «Балалар жылы» аясында түрлі шаралармен 271 мыңнан аса бала қамтылды. Атап айтқанда, 86 мектеп жанында және 4 қала сыртындағы жазғы демалыс сауықтыруға 141,5 мың бала, еңбек пен танымдық шараларға 121,8 мың бала тартылды.
Сондай-ақ, жалпыға бірдей оқу қорынан берілетін материалдық көмек 25 мыңнан 40 мыңға дейін өскен. Жаңа оқу жылында 35 000 балаға қырық мың теңге көлемінде көмек көрсетілген және де тегін ыстық тамақпен 44,8 мың бала қамтылған. Түлектерге 6 мың грант қарастырылған.
-«Оқуға құштар мектеп» жобасы аясында «Үздік оқырман», «Жүз жаңа кітап», «Оқы және өзгеге ұсын!», «Bookcrossing» кітап қозғалысы шараларына 160 мың оқушы қамтылды. Алғашқы рет шатырлы лагер ұйымдастырылып, 1 маусым – халықаралық «Балаларды қорғау» күніне орай «Балапан әлемі», «Каспий BALAFEST» облыстық фестивалі ұйымдастырылды, – дейді Құралай Ғазимова.
Сонымен қатар, балалар құқықтарын қорғау уәкілі тағайындалған. Кәмелетке толмағандардың құқықтарын қорғау, оларға қатысты жасалатын құқықбұзушылықтың алдын алу, қауіпсіздікті қамтамасыз ету мақсатында, Маңғыстау облысының құқық қорғау және мемлекеттік органдары өзара ынтымақтастық туралы үшжақты меморандум жасақталып, оның аясында барлық мектептерге прокуратура қызметкерлері бекітілген.
Қ.Ғазимованың айтуынша, білім беру ұйымдарының бейнебақылау камералары жергілікті басқару орталықтарына қосылып, «Дабыл» түймелері орнатылып, күзет мекемелері енгізілген.
