Маңғыстау облыстық көпбейінді балалар ауруханасында алғаш рет лапароскопиялық әдіспен несеп ағарға ота жасалды.
Отаны аурухананың білікті хирургі Насухан Отарғазиев және уролог Мұрат Бекхожин мен Асхат Сихов жасады.
-Жаңаөзен қаласының тұрғыны 5 күн бұрын балалар ауруханасына түсті. Күндіз іші ауырып, емханаға барған. Ол уақытта соқырішек деп ойлаған. КТ түсіп, несеп ағарында тас бар екені анықталды. Жалпы тексеруден өткеннен кейін, лапароскопиялық әдіспен ота жасалды. Тасты алып тастап, стенд қойылды. Бүгінде жағдайы тұрақты. Бөлімшеде емін алып жатыр,-деді хирург Насухан Отарғазиев.
Айта кетейік, лапароскопия – хирургиялық араласулар мен органдардың диагностикалық зерттеулерін жүргізудің заманауи әдісі. Бұл әдіспен жасалған отадан кейін науқастың денсаулығы тез қалпына келеді.
