Бүгін, 2 мамыр күні Абай атындағы мәдени демалыс кешенінде облыстық жайдарман ойындарының «Маусымашар – 2023» фестивалі өтеді, – деп хабарлайды mangystauzhastary.kz сайты.
Жалпы маусымға 50-ге жуық команда тіркелді. Командалар арасында редакторлық жұмыстар жүргізілді. Әзіл сапасы, деңгейі сарапқа салынды. Нәтижесінде, жайдарманшылардың тәжірибелеріне қарай жоғары, премьер лигаларға жолдама берілді. Ардагер жайдарманшылардың шеберлік сағатына қатысты.
Айта кетейік, редакторлық жұмыстар мен іріктеуден өткен 13 команда бүгін Гала-концертте өнер көрсетеді.
«Боранқұл» командасы» қоғамдық қорының жетекшісі Нұрбол Сағидуллиннің айтуынша, жастардың жайдарман ойындарына деген қызығушылығы жоғары.
– Маңғыстауда жайдарман ойындары екі-үш жылдан бері тоқтап қалды. Биыл жайдарман ойындарын жаңғыртуға Маңғыстау облысының жастар саясаты мәселелері жөніндегі басқармасы қолдау көрсетіп отыр. Алда жастардың басын біріктіріп, жайдарманшылардың жаңа толқынын қалыптастырамыз деген мақсат бар. Бұл меже жақын уақытта орындалады деп ойлаймын. Себебі «Маусымашар – 2023» фестиваліне тіркеліп, сахнада өнер көрсетуге ұсыныс білдіргендердің қатары көп. Бұл жастардың белсенділігі мен жайдарманға деген сағынышын, қызығушылығын білдіреді, – дейді «Боранқұл» командасы» қоғамдық қорының жетекшісі Нұрбол Сағидуллин.
Еске салайық, бар жанарды жаулаған жайдарман ойындарының «Маусымашар – 2023» фестиваліне кіру – тегін. Шара сағат 19:00 басталады.
