Балалар жылы аясында Бейнеу аудандық мәдениет үйінде ерекше білім беруді қажет ететін балаларға арналған «Ерекше жұлдыз» концерті өтті, – деп хабарлайды mangystauzhastary.kz сайты Қоғамдық коммуникация орталығына сілтеме жасап.
Бұл ерекше білім беру қажеттіліктері бар балаларды әлеуметтік оңалтуға және қолдауға бағытталып, өткізіліп отырған бесінші іс-шара. Концертті ұйымдастырушылар «Жайдарлы» ҮЕҰ және аудандық білім бөлімі осы санаттағы балалардың өміріне деген қызығушылығын оятқысы келетіндерін, сондықтан олар өздерін қажет сезініп, қоршаған ортаға бейімделе алатындығын атап өтті.
Балалар концертте жетекшілерімен жұптасып ән шырқады. Таланты мен өнерге деген талпынысы шексіз балалар жиналған көрерменнің ыстық ықыласына бөленді. Көрермендер атап өткендей, дуэттер нағыз жұлдыздар сияқты кәсіби көрінді, олардың өнерге деген құштарлығы сезілді.
Көрермендер арасында аудан әкімі Бейнеубек Әбіловте болды. Ол арнайы қатысып, ерекше балаларды құттықтап, оларды қорғау және қолдау мемлекеттің басты саяси бағыттарының бірі екенін атап өтті. Кешке қатысып, өнерін көрсеткен әр балаға демеушілердің және де аудандық мәслихат депутаттарының атынан сый-сияпаттар берілді.
Мүмкіндігі шектеулі жандардың шығармашылық қабілеттерін шыңдап, қоғаммен етене байланыста болуына күш-жігерін салып жүрген «Жайдарлы» ҮЕҰ-ның директоры Нәбия Айлашоваға «Қазақстанның азаматтық Альянсы» президентінің алғыс хаты табысталды. Сонымен қатар шараға атсалысып, демеушілік көрсеткен бірқатар кәсіпкерлерге аудан әкімі атынан алғыс хат берілді.
