Футболдан 2022 жылғы әлем чемпионаты өз мәресіне жетті. Сонымен, пенальти сериясында Франция командасын жеңген Аргентина құрамасы – 2022 жылы Катарда өткен әлем чемпионатының чемпионы атанды.
Төрткүл дүние көз тіккен доп додасының финалы Лусаил қаласындағы 80 мың адамға арналған «Лусаил Айконик» стадионында өтті.
Француздардың қақпасына алғашқы голды әйгілі Лионель Месси салса, артынша көп ұзамай, аргентиналық Анхель Ди Мария екінші соққыны жасап, есепті 2:0 жеткізді. Франция құрамасының шабуылшысы Киллиан Мбаппе матчтың 80-минутында алғашқы голды соқса, 1 минут өтер-өтпес дубль жасап, есепті теңестірді. Матчтың қосымша таймының 108-минутында Лионель Месси матчтағы екінші голын салса, 118-минутта Киллиан Мбаппе хет-трик жасап, есепті тағы бір мәрте теңестірді. Тартысты бәсекенің негізгі және қосымша таймы 3:3 есебімен тең аяқталып, матч пенальти сериясына ұласты. 11 метрлік нүктеде дәлдік танытқан Аргентина құрамасының футболшылары жеңімпаз атанды.
Айта кетейік, Аргентина құрмасы футбол тарихында әлем чемпионатының финалында алтыншы рет өнер көрсетті. Нақты статистика төмендегідей:
• 1930 жылы: Уругвай 4:2 Аргентина;
• 1978 жылы: Аргентина 3:1 Нидерланд;
• 1986 жылы: Аргентина 3:2 Германия;
• 1990 жылы: Германия 1:0 Аргентина;
• 2014 жылы: Германия 1:0 Аргентина.
Сонымен, футболдан 2022 жылғы әлем чемпионатында Аргентина чемпион атанса, Франция құрамасы 2-орынды місе тұтты. Ал Хорватия құрамасы бұл жолғы чемпионаттың қола жүлдегерлері атанды.
