Ақтаудағы NIS оқушылары Нұрлыбек Оңдаған және Мырзаәлі Асанов зағип жандарға арналған «DolphEYE» көзілдірігін жасады. Оқушылар жақында өткен республикалық ғылыми жобалар байқауына қатысып, «Техника» секциясы бойынша 1-орын иеленді.
Жалпы статистикалық мәлеметтерге сүйенсек, әлемде 300 миллионнан астам көру қабілетінен айрылған жан өмір сүреді. Осы орайда «DolphEYE» көзілдірігі зағип жандардың күнделікті өмірінде туындайтын қолайсыздықтардың алдын алады. Яғни, көзілдірік зағип жанға А нүктесінен Б нүктесіне кедергісіз жетуіне мүмкіндік береді.
– Әрбір ғылыми зерттеу қоғамдағы мәселелердің алдын алуына, шешім табуына бағытталуы керек. Сондықтан былтырғы жобам қоғамдағы «кішкентай адамдар» жайында болса, ал кезекті жобам зағип жандардың күнделікті өмірде кедергісіз жүріп-тұруына жағдай жасауға негізделді. Жетекшіміз Ибалы Талғатқызының қолдауымен жүзеге асқан «DolphEYE» көзілдірігі зағип жандар қоғамына көмегін тигізеді деген сенімдемін,- дейді жоба авторы Нұрлыбек Оңдаған.
Жоба авторы Мырзаәлі Асановтың айтуынша, негізгі мақсат – зағип жандарды қоғамнан алыстатып алмау, олардың комплекс мәселесіне бейжай қарамай, қолайлы өмір сүруіне мүмкіндіктер жасау.
– Жобаның техникалық бөлігін «Аrduino» платформасы құрайды. Соның көмегімен көзәйнек дыбыс толқындарын жіберіп, көру қабілеті нашар адамның алдындағы кез-келген кедергіні анықтап, оған белгі береді. Бұдан бөлек құрылғыда Bluetooth толықтыруы бар. Ол ұялы телефонға жалғанып, қолданушыға қаланың картасын ашып, А нүктесінен Б нүктесіне маршрут құру мүмкіндігін береді. Ал 3D принтер арқылы басып шығарылған жақтау «DolphEYE» – дың қанқасын қарапайым көзілдірікке ұқсатады. Бұл зағип адамның қоғам өміріндегі денсаулық ерекшелігіне байланысты қысымнан айырады, – Мырзаәлі Асанов.
