Ақтау гарнизонындағы теңіз жаяу бригадасына Маңғыстау облысынан 11 мектептен келген 200 оқушы «Республика күні» қарсаңында ұйымдастырылған «Ашық есік» күніне қатысты. Олар әскери қызметшілердің күнделікті қызметімен, әскери қару-жарақ және техникамен танысты.
Шараға облыс әкімінің орынбасары Ұлықбек Тналиев қатысып, жастармен бірге әскери бөлімнің жұмысымен танысты. Іс-шараның басты мақсаты жас ұрпақтың бойына отансүйгіштікті сіңіру, әскери-патриоттық тәрбиелеу болып отыр.
-Әскерилердің бір күн өмірімен танысуға келдік. Маған өте ұнады. Бұл шараны ұйымдастырған дұрыс деп ойлаймын. Себебі, оқушыларды әскери өмірге қызықтыру үшін керек деп ойлаймын. Алыс қашықтықтағы ракета, бір атқаннан жоятын гранатаатқыш және снайперлерді көріп, қызығушылығым екі есе артты. Сондықтан мен болашақта әсери адам боламын деп шештім, – деді 11 сынып оқушысы Асхат Куспусинов.
Әскери бөлімнің басшылығы әскери бөлімнің құрылу тарихы мен жеткен жетістіктерін сонымен қатар әскери тәртіп, дене даярлығы, әскери қызмет және оқу-жауынгерлік тапсырмалардың өту тәртібі туралы айтып түсіндірді. Ал нұсқаушы ретінде мерзімді әскери қызметтегі сарбаздар қатарынан тағайындалғандар техникалар мен қару жарақтарды таныстырды.
-Абылай хан бабамыз осы кең байтақ жерімізді, қазақтың елі еркіндікте өмір сүрсін деп 50 жыл аттан түспей қорғаған жерді бүгінгі таңда өсіп келе жатқан іні бауырларымызға жүректеріне Отан қорғау қасиетін бекіту болып табылады деп ойлаймын. Қолданыстағы атыс-қарулар мен техникамен танысқан оқушылар осыдан кейін әскерге деген көз-қарастары өзгеріп, отансүйгіштік қасиеттерінің оянуына бір үлкен себеп болатын шығар деген үміттемін, деп атап өтті зениттік дивизион командирінің орынбасары, майор Рүстембек Дәрменбаев.
Айта кетейік, әскери бөлімде ашық есік күнін өткізу өткен жылы басталған. Енді бұл шара дәстүрге айналмақ.
