Ақтаудағы «Достық үйінде» бүгін сағат 15:00-де «Жырлансын ел бірлігі» жыршылар фестивалі өтеді.
Кешті ұйымдастырудағы басты мақсат – халықтың ауыз әдебиеті, әдет-ғұрып, тарих, дін, діл, мәдениет, салт-санамен тығыз байланыста өрбіген, қазақ ақын-жырауларының мұраларын насихаттау.
-Маңғыстау өлкесінде жыршылар фестивалі алғаш рет ұйымдастырылып отыр. Атаулы шара халықтың еңсесін көтеріп, рух беріп, бірлікке, татулыққа шақырады. Республикамыздың 5 жыр мектебінен, яғни барлығы 15 жыршы қатысады. Атап айтқанда Ақтөбеден-Әділбек Сарин, Атыраудан – Аманжол Дауылбаев, Сыр бойынан – Берік Жүсіпов және Ақмарал Ноғайбаева, Батыс Қазақстаннан – Фархат Оразов, Жетісу өңірінен – Ерболат Шалдыбеков, Арқадан- Доскей Ботпай келді, – дейді Маңғыстау облыстық мәдениет, архивтер және құжаттама басқармасының басшысы Пәния Сармурзина.
Сыр өңірінен келген эпик жыршы Берік Жүсіповтың айтуынша, бұл фестиваль қазақ халқы үшін үлкен тәжірибе. Өйткені, фестивальде жыршылар тек өз өңірлерінің емес, өзге өлкелердің де шығармаларын орындайды.
-Жыршылар Кете Жүсіп, Майлықожа, Арыстанбай мен Сыпырадан қалған жырды сапырып, жыраулық өнер қаймақтарының шығармаларын көпшілікке паш етпек. Абыл, Нұрымдар мекен еткен жеті жұрт келіп, жеті жұрт кеткен жерде, Маңғыстаудың жыршыларының шығармаларын арқау етеміз. Бұл – біз үшін үлкен эксперимент және жаңалық, – дейді Берік Жүсіпов.
