Ақтауда спорт саласының дамуына үлес қосқан саңлақтар «Жас батыр үздігі – 2022» номинациясымен марапатталды. Спорт мектебінің 6 бапкері мен 27 спортшысы үздіктер қатарынан көрінді.
Салтанатты шарада еліміздің абыройын әлемдік ареналарда асқақтатып, көк туымызды желбіретіп жүрген қайсар ерлер мен қыздарға арнайы алғыс хат, ескерткіш және ақшалай сыйақы табысталды. Кешке Ақтау қаласы әкімінің орынбасары Әбілқайыр Байпақов қатысып, спорт саласының үздіктеріне жылы лебізін білдірді.
-Маңғыстау облысы дарынды спортшылармен атағы шыққан өңір. Әлемдік, республикалық дүбірлі додаларда алдыңғы қатарды иеленуіміз спортшылардың және дайындаған бапкерлердің арқасы. Жыл үздігі атанған спортшылар, әлі де талай белестерді бағындыратынына кәміл сенемін, – деді Әбілқайыр Байпақов.
Мараппаттау рәсімін шараның бас ұйымдастырушысы Манарбек Бисекенов жалғастырды.
-«Жас батыр» мектебінде 1200-ден астам спортшы жаттығады. Солардың арасында 150 спортшыға ерекше алғыс хаттар табысталып, 27 спортшыға жыл үздігі атағын табыстадық. Бүгінде салауатты өмірді насихаттап, бұқаралық спортты дамытуға үлес қосып жүрген жандарға алғыс білдіреміз, – деді «Жас батыр» спорт мектебінің басшысы Манарбек Бисекенов.
Атап айтқанда «Үздік жаттықтырушы-2022» номинациясының иегері Берік Жұмағалиев, дзюдодан – «Үздік жаттықтырушы-2022» Жомарт Қобланов алса, жекпе-жек сайысынан – «Үздік жаттықтырушы-2022» Арсен Гаджимагомедов, таеквондодан – «Үздік жаттықтырушы-2022» номинациясын Дастан Қуанғали иеленді. Ал спорттық гимнастика бойынша – «Үздік жаттықтырушы-2022» Сайлаубай Рахов, гимнастика бөлімінен – «Үздік жаттықтырушы-2022» Анастасия Алексеева ерекше атаққа ие болды.
Салтанатты марапаттау рәсімі барысында, Маңғыстау облысы полиция департаментінің басшысы Аян Сәбитұлы шараның бас ұйымдастырушысы Манарбек Бисекеновтің кеудесіне «Қазақстан полициясына 30 жыл» төсбелгісін тақты.
Шараның соңында «Жас батыр» мектебі спортшыларының жетістіктерін хабарлап, ақпарат таратып жүрген журналистер сахна төріне шақырылып, арнайы грамоталар табысталды.
