Маңғыстау облысы білім басқармасының мектепке дейінгі және жалпы білім беру бөлімінің басшысы Клара Құлатаеваның айтуынша, 2022-2023 оқу жылына денсаулық сақтау саласына – 150; ауыл шаруашылығы және биоресурсатр – 15; өнер саласына – 10 грант бөлінген.
Конкурсқа қатысу үшін Қазақстанның 18 жоғары оқу орындарынан өтінім келіп түскен, комиссия ұйғарымымен 16 ЖОО-на мемлекеттік тапсырыс беріледі деп шешілді. Оның ішінде, жалпы медицина бойынша – 8, ауыл шаруашылығы бойынша – 4, өнер бойынша – 4 университет тапсырысты жеңіп алған.
Талапкерлерден құжат қабылдау уақыты ағымдағы жылдың 8-12 тамыз аралығында онлайн түрде жүргізіледі. Талапкерлер құжаттарын bilimbaskarmasy2022@mail.ru электронды мекен-жайына жолдау керек.
– Жалпы, бұл грант ҚР Үкіметінің 2008 жылғы 23 қаңтардағы №58 Қаулысы негізінде 2018 жылдан бері жергілікті бюджет есебінен жүзеге асырылып келеді. Жоба жүзеге асырылған 4 жыл уақыт ішінде 700 білім беру гранты бөлінді – дейді, Клара Құлатаева.
Айта кетейік, қабылдау басталғалы «Жалпы медицина» мамандығына – 100-ден астам, өнер мамандықтарына – 4, ауыл шаруашылығына – 1 өтініш келіп түскен. Соның ішінде, 9 құжат талапқа сай болмауына және құжаттарының жетіспеуіне байланысты кері қайтарылған.
Тапсыруға міндетті құжаттар тізбесі:
1) белгіленген үлгідегі бланкіде өтініш (Өтініш үлгісі Білім басқармасының www.mangystau.gov.kz ресми сайтында жарияланды);
2) жалпы орта білімі туралы құжат көшірмесі (құжаттарды жоғары оқу орнының қабылдау комиссиясына тапсырған кезде төлнұсқа тапсыру);
3) ҰБТ сертификатының көшірмесі, студенттер үшін соңғы сессия қорытындысы, интернатураға тапсыратындарға «бакалавр» бітіргендігі жөнінде диплом көшірмесі (құжаттарды жоғары оқу орнының қабылдау комиссиясына тапсырған кезде төлнұсқа көрсету);
4) 086-У нысаны бойынша медициналық анықтама көшірмесі (құжаттарды жоғары оқу орнының қабылдау комиссиясына тапсырған кезде төлнұсқа тапсыру);
5) жеке басын куәландыратын құжаттың көшірмесі;
6) Көп балалы, аз қамтылған отбасы, жетім және ата-ана қамқорлығынсыз қалған балалар екендігін дәлелдейтін құжаттар көшірмесі(болған жағдайда);
7) «Жалпы медицина» мамандығына тапсырушыларға психометриялық емтихан анықтамасы;
Талапкерлердің құжаттарын қарау үшін конкурс комиссиясының отырысы – ағымдағы жылдың 17-18 тамызында өткізілмек. Грант иегерлерінің тізімі облыс әкімдігінің, білім басқармасының сайттарында 20-тамызға дейін жарияланатын болады, ал білім беру гранты туралы куәлік ағымдағы жылдың 25-тамызынан кешіктірілмей беріледі.
