Рок, Pop және R&B, джаз. Кеше осы музыкалық жанрларда еркін жүзетін жастармен таныстық. Олар ешкімге ұқсамайды, өз айтары бар. Бірақ жазған сөз бен музыкалық үн көпті бір арнаға тоғыстырады. Олар сезімді жасырмайды, сондықтан да әлем оларды қуана қарсы алады. Бұған біз кеше куә болдық.
Жә, олай болса, Маңғыстаудың заманауи музыка әлемін қозғалтқан жастарды таныстырайық.
Бұл – Қожаназар мен Әмір. Лақап аты – KOZHAN, AMIRINHO. Екеуі де – 18 жаста. Айтуынша, бала кезден бері музыкаға деген қызығушылығы болған. Ал 2018 жылдан бері ән жазып, музыка әлеміне ене бастаған.
«Кеште өзім жазған «Сау бол» әнін орындадым. Бұл ән қоштасу керек болған бір қызға арнап жазылған. Жалпы, мен үшін ән жазу – іштегі сезімдерді шығару. Осы уақытқа дейін 3 ән жарыққа шықты. Жақында Әмір екеуміз «Құс жолы» әнін көпке ұсынамыз», – дейді Қожаназар.
Ал Әмір кеште Қожаназармен бірге «Cherry Pie» әнін орындады. Аталған ән алғашқыда әзіл ретінде шыққан екен.
««Cherry Pie» – әлеуметтік желіде танысып, сөйлескен құрбыға арналған. Карантин кезінде әзіл ретінде шығара салғанмын. Яғни, сол кездері құрбымның онлайн сабағы басталды, жұмысы көбейді. Осылайша, жеке өмірге үлгертпей, әрі қарай сөйлесуімізге кедергі келтірген. Содан мен «Бітпейтін сабақтармен қалдың босамай, кеттің сен, Cherry Pie» деп жай әзілдеп айттым. Кейін Қожанның арқасында ол ән жаңа деммен жарыққа шықты», – дейді Әмір.
Жалпы екі жас музыкант та махаббаттан шабыт алады. Себебі махаббат жүректі қозғайтын күш деп есептейді.
«Ән шығарғанда ішкі жан-дүниеммен бөліскім келеді. Оны жұрт жай тыңдамаса екен деген үміт бар. Қандай жағдай болса да ішіңіздегі сезімді жасырмай, әлемге махаббат сыйлаңыздар», – дейді Әмір.
Келесі кейіпкеріміз – OIU. Шын есімі – Исламбек. Жаңаөзен қаласының тумасы, жасы – 19-да.
Исламбек алты жылдан бері музыкамен айналысады. Оның қызығушылығы қазақша рэп тыңдаудан басталған. Кезінде Домалық, Жақау, Әли есімді рэперлер музыка жолына келуге себепші болған.
«Шабытты қоршаған ортадан аламын. Көрген, сезінген дүниенің барлығын қағаз бетіне түсіремін. Солай тыңдармандарыммен әңгімелесу арқылы іштегі көңіл күйді жеткіземін», – дейді Исламбек.
Қазіргі таңда Исламбектің бес әні жарыққа шыққан. Жақында тағы екі әнін тыңдармандарға ұсынбақ. Одан бөлек клип түсіріп, тағы да шығармашылықпен айналысуды жоспарлап отыр.
Айта кетейік, бұл өнерлі жастар осы уақытқа дейін музыкалық әлемін қағазға түсіріп, оны бүктеп, төрт қабырғада сақтаған. Барлығы да алғаш рет сахнаға шығып, көпке өнерін жеткізіп жатыр. Тіпті, алғашқы күннен-ақ қошеметке бөленуде. Мұндай мүмкіндік Жастар күнінде берілді. Ал тұншығып, көп тұрған өнерді жарыққа шығаруға «Aktownx» шығармашылық бірлестігінің «Жиналайық» жобасы себепші болған. Олай болса, «Жиналайық» жаңа жұлдыздарды жарыққа шығарды. Келісесіз бе?
